د پوهنې وزارت د نتايجو او شهادت نامو ریاست د رسمي اسنادو الکترونیکي سیستم"بريد" پرانيستل شو
د پوهنې وزارت د نتايجو او شهادت نامو رياست د سندونو د الکترونیکي کولو رسمي سیستم "بريد" د ياد وزارت د کيفيت تضمين معين الحاج مولوي عبدالخالق صادق، د نتايجو او شهادت نامو رئيس مولوي عبدالقدیم محمد آخندزاده، د مرکزي څانګو یو شمېر مسئولینو او د ياد رياست د کارکوونکو په ګډون، پرانيستل شو.
غونډه د سپېڅلي الهي کلام د څو مبارکو آیتونو په تلاوت سره پیل شوه.
ورپسې د پوهنې وزارت د کیفیت تضمین معين راغلو مېلمنو ته د ښه راغلاست ترڅنګ، د رسمي او اداري اسنادو د الکترونیکي کولو د سیستم"بريد" په ګټو خبرې وکړې.
دغه راز نوموړي وویل: "پوهنې وزارت د اداري کارونو د چټکتیا، روڼتیا، د مراجعینو د وخت د ضایع کېدو د مخنیوي او په ورځنیو چارو کې د لاښه والي په موخه، خپلو هڅو ته دوام ورکوي، چې یو له لویو لاس ته راوړنو څخه يې" د رسمي اسنادو "بریډ"برېښنایي کولو سیسټم پيلول دي.
د پوهنې وزارت د کيفيت تضمين معين څرګنده کړه: زموږ په هېواد کې څلوېښت کلنو جګړو له بده مرغه د هېواد د اداري نظام په ګډون ټولو برخو ته نه جبرانېدونکې زیانونه اړولي او اړتیا ده، چې د نننۍ ټکنالوژۍ په کارولو سره اداري سيستمونه اصلاح او د رسمي اسنادو چمتو کولو کې روڼتيا رامنځته شي، تر څو د هېواد راتلونکي نسلونه وکولا شي د خپلو خلکو او هېواد په وړاندې خپلې مهمې دندې په ښه توګه ترسره کړي.
ورپسې د پوهنې وزارت د نتایجو او شهادت نامو رئیس د اداري کارونو برخه کې په نظم، نوښت او قوي مدیریت ټینګار وکړ او د "بريد" سیستم یې د ستونزو په مخنیوي او د کارونو د روڼتيا په برخه کې اغېزمن وباله.
په پای کې، د پوهنې وزارت د کیفیت تضمين معين له لوري په رسمي ډول ياد سيستم پرانيستل شو.
