په لغمان ولایت کې د ۲۰ بابه ښوونځیو د بیارغونې چارې پای ته ورسېدې
د لغمان ولایت پوهنې ریاست مسئولین وايي، په دې وروستیو کې د شاوخوا شل بابه ښوونځيو د ترمیم چارې، چې له کلونو راهیسې تخریب او وېجاړ شوې ؤ، د یوې همکارې مؤسسې په مرسته په اساسي ډول ترمیم او ورغول شول.
د لغمان پوهنې رئیس مولوي شاه جهان ساجد په وینا؛ د يادو ښوونځيو د ودانيو بيارغاونې چارې درۍ مياشتې وړاندې پيل شوې وې او نن د دغه ولايت د پوهنې مشرتابه له لوري د يو لړ مراسمو په ترڅ کې ګټې اخيستنې ته وسپارل شول.
د يادونې وړ ده، چې د يادو ښوونځيو پر ودانيو ټولټال دوه ميليونه او اته سوه زره افغانۍ لګښت راغلى دى.
د پوهنې رئيس د ښوونځيو د بيا پرانيستلو پر مهال له زده کوونکو وغوښتل، تر څو د خپلو ښوونځيو د وسايلو ساتنې ته جدي پاملرنه وکړي.
په همدې حال کې د ښوونځيو يو شمېر زده کوونکو خوښي څرګنده کړه چې د دوى د زده کړو لپاره یو ځل بيا خوندي او مناسب چاپېریال برابر شو.
