له ولایتونو څخه د پوهنې کړنو ته لنډه کتنه
بلخ
د پوهنې وزارت د داخلي پلټنې پلاوی چې څو ورځې مخکې د بلخ ولایت پوهنې ریاست د فعالیتونو د ارزونې په موخه یاد ولایت ته تللی ؤ، د پروسې له بشپړېدو وروسته یې د خپلو څېړنو پایلې د وزارت له مشرتابه سره شریکې کړې.
کابل
د هېواد د خصوصي ښوونځيو د اتحاديې مسئولينو د کابل ښار د پوهنې له رئيس حافظ عبدالباسط حقاني سره په کتنه کې، د خصوصي ښوونځيو د ښوونیز بهير د لاښه والي په اړه خپلې اړتياوې او وړانديزونه له پوهنې رئیس سره شريک کړل.
د کابل پوهنې رئیس د اړوندو ستونزو او وړاندیزونو په حل کې د همکارۍ ژمنه وکړه.
هرات
د هرات ولایت مرکز اړوند ښوونځیو د زده کوونکو د ۱۴ سپورتي لوبډلو ترمنځ د «صلاح الدین ایوبي کپ» تر نامه لاندې د فوټبال سیالۍ د پوهنې مسئولینو او زده کوونکو په ګډون د اسلامي انقلاب عالي لېسې په سپورتي لوبغالي کې پیل شوې.
د پوهنې ریاست مسئولینو سپورت د زده کوونکو د ذهني او جسمي روغتیا لپاره مهم وباله او له هغوی یې وغوښتل چې سپورتي فعالیتونه په خپلو ورځنيو پلانونو کې شامل کړي.
تخار
د تخار ولایت پوهنې ریاست له ۱۵ تنو نوماندانو څخه رقابتي آزموینه واخیسته.
هغه کسان چې معیاري نمرې ترلاسه کړي، د یاد ولایت د پوهنې ریاست په څانګو کې به د قراردادي کارکوونکو په توګه وګمارل شي.
بدخشان
د بدخشان ولایت پوهنې ریاست، له ۲۳۱ تنو هغو نوماندانو څخه چې مخکې یې په پینځو قراردداي بستونو کې نوم لیکنه کړې وه، آزموینه واخیسته.
