له ولایتونو څخه د پوهنې خبرونو لنډیز
پکتیا
د پکتيا ولايت پوهنې رئيس مولوي عبدالوکيل خالد د یاد ولايت د ښوونځيو له مسئولينو سره د ليدنې پر مهال، د پوهنې رياست د رهبرۍ د حکمونو او لارښوونو د پلي کېدو په اړه خبرې وکړې او له هغوی یې وغوښتل، چې د زده کوونکو د ښوونیزې کچې لوړولو، د ښوونکو د درسي پلان او د زده کوونکو نظم او سپلین ته جدي پاملرنه وکړي، څو په ښوونځیو کې د ګډوډۍ مخه ونیول شي.
لغمان
د لغمان ولایت پوهنې رئیس مولوي شاه جهان ساجد د پوهنې وزارت د کیفیت تضمین معینیت د څارنې او ارزونې پلاوي سره په ګډه د ګمبن او مریم د نجونو لېسو له اداري او تدریسي چارو څخه د څارنې پر مهال، د ښوونکو د تدریس او د زده کوونکو د زده کړې کچې وارزولې.
کاپیسا
د کاپیسا ولایت د حصه اول ولسوالۍ د مولوي جلال الدین شهید عالي لېسې مسئولینو د هغو ممتازو زده کوونکو ستاینه وکړه، چې د سږ کال د کانکور په آزموینه کې یې لوړو زده کړو ته لاره پیدا کړې ده.
ننګرهار
د ننګرهار ولايت پوهنې رئيس مفتي حبيب حضرت حقاني د یاد ریاست له کارکوونکو سره د ليدنې پر مهال، د نوي تشکيل د نهايي کېدو، د کارکوونکو د معاشونو پر څرنګوالي، د ښوونکي د ورځې نمانځلو او يو شمېر نورو مهمو ښوونیزو مسايلو په تړاو تفصیلي خبرې وکړې.
کاپیسا
د کاپيسا ولایت حصه اول ولسوالۍ د شيرک پيرک د نجونو د لېسې نوې آمره د یادې ولسوالۍ د پوهنې آمر له لوري استادانو او زده کوونکو ته ور وپېژندل شوه او رسماً يې خپله دنده پيل کړه.
