په پکتیکا ولایت کې د یوې دیني مدرسې ودانۍ ګټې اخیستنې ته وسپارل شوه
د پکتیکا ولایت یوسف خېلو ولسوالۍ اړوند د برتخیلو په کلي کې، د البدریه مدرسې د ودانۍ چارې بشپړې او د یاد ولایت د رهبري پلاوي،د پوهنې ریاست مشرتابه، علماوو، د ملکي او نظامي چارواکو په ګډون، د یو لړ شاندارو مراسمو په ترڅ کې پرانیستل شوه.
د پکتیکا والي الحاج مولوي فیض الله جمال حقاني، د پوهنې رئیس او نورو ویناوالو په ټولنه کې د علماوو او دیني مدارسو د مقام په اړه خبرې وکړې او د ښوونځیو او دیني مدارسو له مسئولینو یې وغوښتل، چې د ځوانانو د سالمې ښوونې او روزنې په برخه کې لازیاتې هلې ځلې وکړي.
د یادې دیني مدرسې ودانۍ د ۳،۵ میلیونه افغانیو په لګښت، د یو تن دیني عالم او بنسټګر جاوېد بدري او د سیمې د خلکو له لوري، په څه باندې یو جرېب ځمکه کې جوړه شوې ده.
