په هرات ښار کې د شهید فوزیه ښوونځی پرانیستل شو
دهرات ښار اړوند د شهيد فوزيه ښوونځي د درېيم پوړ چارې چې د سيد عبدالغفار پاینده په شخصي لګښت بشپړې شوې وې، د هغو شانداره مراسمو په ترڅ کې، چې پکې د هرات پوهنې رئیس، ديني علماوو، مشرانو، ښوونکو او زده کوونکو ګډون درلود، پرانیستل شو.
په یادو مراسمو کې د پوهنې رئیس د ياد ښوونځي په جوړولو او بيارغونه کې د سوداګرو او د پوهنې دوستو شخصيتونو له همکارۍ مننه او قدرداني وکړه او د پوهنې د ودې او پراختيا په برخه کې يې د خلکو ونډه ارزښتناکه وبلله.
د هرات پوهنې رئيس د یاد ښوونځي د درېيم پوړ له جوړېدو څخه خوښي څرګنده کړه او ويې ويل، پوهنې وزرات د ټولو خلکو ګډ کور دى او له ټولو سوداګرو او د ټولنې له بېلابېلو طبقو يې وغوښتل، چې په هرات کې له پوهنې سره همکاري وکړي.
ويل کيږي چې د ياد ښوونځي د درېيم پوړ په بشپړېدو سره د ټولګيو د کمښت له امله د زده کوونکو ستونزې له منځه تللې او کولاى شي په يوه مناسب تعليمي چاپيريال کې خپلو زده کړو ته دوام ورکړي.
