د پوهنې وزارت سرپرست په یوه رسمي سفر میدان وردګ ولایت ته ولاړ
د پوهنې وزارت سرپرست الحاج مولوي حبیب الله آغا د یوشمېر کارپوهانو په ملتیا، د ښوونیز وضعیت څېړلو په موخه، میدان وردګ ولایت ته رسمي سفر وکړ.
په پیل کې د پوهنې وزارت سرپرست د میدان وردګ له پوهنې رئیس او مشرتابه سره له کتنې او یاد ولایت ته د خپل سفر د موخو له بیانولو وروسته، په هغه غونډه کې ګډون وکړ، چې پکې د پوهنې ریاست مسئولین، آمرین، مدېران او ښوونکي حاضر وو.
غونډه د قرآن عظیم الشان په څو مبارکو آیتونو تلاوت سره پیل شوه او ورپسې د میدان وردګ ولایت پوهنې رئیس مولوي محمد عثمان حریت، د پوهنې وزارت سرپرست او ورسره مل پلاوي ته ښه راغلاست ووایه او د پوهنې ریاست د یو کلنو کړنو او لاسته راوړنو راپور یې پلاوي ته وړاندې کړ.
ورپسې د پوهنې وزارت سرپرست د یاد ولایت له خلکو او مسئولینو څخه د دوی د مېلمه پالنې له امله مننه وکړه او په خپلو خبرو کې یې وویل: خوښ یم چې له تاسو، د پوهنې ریاست مسئولینو او د میدان وردګ ولایت د پوهنې مینه والو سره مې له نیږدې وکتل.
نوموړي د پوهنې ریاست کارکوونکو ته په خطاب کې زیاته کړه: تاسو د پوهنې د کورنۍ غړي یاست او په تاسو لازمه ده، چې مسئول واوسئ او د خلکو او وطن په وړاندې خپل مسئولیتونه په لاښه توګه او مهربانۍ سره سرته ورسوئ.
د پوهنې وزارت سرپرست زیاته کړه، زموږ ښوونکو ته هم لازمه ده، چې د زده کړې په برخه کې د هېواد بچیان په اسلامي روحیه وروزي او په دې لاره کې هر ډول هڅې ونه سپموي.
ورپسې یو شمېر استادانو، علماوو او د خلکو استازو د یو شمېر وړاندیزونو د وړاندې کولو په ترڅ کې، د پوهنې وزارت د پروګرامونو او پلانونو د تطبیق او په یاد ولایت کې د ښوونیز بهیر د ودې په برخه کې، مشرتابه ته له خپل لوري ملاتړ څرګند کړ.
غونډه د دعائیې په لوستلو سره پای ته ورسېده.
