له ولایتو څخه د پوهنې د خبرونو لنډیز
هرات
د هرات ولايت پوهنې رئيس مولوي عبدالله اميني، په افغانستان کې د ترکيې د ښوونې او روزنې بنسټ له لوی رئیس احمد تکور سره وکتل او د هرات له پوهنې رياست سره د یاد بنسټ د دوامداره همکاريو قدرداني وکړه.
د پوهنې رئیس د ترکيې د ښوونې او روزنې بنسټ له لوی رئیس څخه وغوښتل، چې د هرات پوهنې رياست د پروګرامونو د پلي کېدو په برخه کې له یاد رياست سره خپلو همکاريو ته دوام ورکړي.
په پاى کې د ياد بنسټ لوی رئیس، له پوهنې رياست سره د همکاريو د دوام ډاډ ورکړ.
ننګرهار
د ننګرهار ولايت پوهنې رئيس مفتي حبيب حضرت حقاني، د یاد ولايت په بهسودو ولسوالۍ کې د محمد حسن شيباني خصوصي دارالعلوم او دارالایتام اداري او تدريسي چارې وڅېړلې او د قرآني علومو پرفضیلت او د بې سرپرسته زده کوونکو په سالمه ښوونه او رزونه يې ټينګار وکړ.
دایکنډي
د دایکنډي ولایت پوهنې رئیس الحاج مفتي رحمت الله مدثر، د یاد ولایت مرکز اړوند د پای نیلي د ښځینه وو منځني ښوونځي له تدریسي او اداري چارو څخه څارنه وکړه.
د یاد ولایت پوهنې رئيس له ښوونکو او زده کوونکو سره د جلا جلا کتنو په ترڅ کې، ښوونکي لاښه تدريس او زده کوونکي د علم او پوهې زده کړې ته وهڅول.
زابل
د زابل ولایت پوهنې ریاست له لوري اړتیا په کتو مولوي محب الله فهیم د یاد ولایت پوهنې ریاست د مخابراتو د مدېر په توګه وټاکل شو او د پوهنې رئیس الحاج مولوي ګل ولي متقي له لوري، د یو لړ شانداره مراسمو په ترڅ کې کارکوونکو ته ور وپېژندل شو.
کابل
د کابل ښار پوهنې ریاست اداري غونډه د یاد ریاست د آمرینو او مسئولینو په ګډون جوړه شوه .
په یاده غونډه کې، د ښوونیزو چارو د سمون، د ښوونځیو د اداري او تدریسي ستونزو د حل او د لاښو ښوونیزو خدمتونو د وړاندې کولو په اړه پکې تفصیلي بحثونه وشول.
