د هېواد شمالي ولایتونو ته د پوهنې وزارت د انساني سرچینو لوی رئیس سفر وکړ.
د پوهنې وزارت د انساني سرچینو لوی رئیس مفتي محمد یوسف ثاقب، د یادې ادارې له یو شمېر کارپوهانو سره یو ځای د هېواد شمالي (بغلان، کندز، تخار او بدخشان) ولايتونو ته سفر وکړ.
ياد پلاوي د بغلان ولایت پوهنې ریاست له بېلابېلو څانګو څخه د لیدنې پر مهال، له پوهنې رئیس او د ياد رياست له یو شمېر مدېرانو سره په ښوونځیو کې د يو لړ ستونزو په ځانګړې توګه د ښوونکو د کمښت او تشکيلاتي کمبود په اړه خبرې وکړې.
د خبرو په ترڅ کې د ښوونيزو بنسټونو د تأسیس، د زده کونکو او په ځانګړې توګه د یتیمو زده کونکو د احصایې راټولولو او د ښوونکو او کارمندانو ګمارلو په اړه د پریزنټیشنونو له لارې معلومات ورکړل شول.
د سفر په دوام ياد پلاوي، له اړوندو مسئولینو سره د مراجعینو په کارونو کې چټکتیا، پر وخت تطبیق او ښه چلند په اړه خبرې وکړې او په پای کې يې د مراجعینو شکایتونه هم واورېدل.
