په فارياب ولايت کې د يوه لومړني ښوونځي نوې ودانۍ پرانيستل شو.
د فارياب ولايت المار ولسوالۍ د قره غويلي لومړني ښوونځي ودانۍ، د ولايت مقام رهبري پلاوي، د پوهنې رياست مسئولينو ، ديني عالمانو، قومي مشرانو او د دغه ولايت د يو شمېر نظامي او ملکي چارواکو په ګډون د يوې غونډې په ترڅ کې پرانيستل شوه او ګټې اخيستنې ته وسپارل شوه.
د فارياب ولايت مرستيال مولوي حميدالله ارشاد، د پوهنې په ارزښت او د هېواد د بچيانو لپاره د پوهنې وزارت له لوري د لازمو ښوونيزو آسانتياوو د برابرولو په اړه خبرې وکړې او د ياد ولايت د پوهنې له بهير څخه يې د ولايتي ادارې د ملاتړ اعلان وکړ.
ورپسې د ياد ولایت د پوهنې رئیس مولوي سید حفیظ الله معتصم بالله پوهنه د ټولنې له مهمو اساسي اړتیاوو څخه وبلله او د پوهنې ریاست یې د ماشومانو لپاره د زده کړو د آسانتیاوو په برابرولو کې ژمن وباله.
نوموړي له خلکو وغوښتل چې د خپلو اولادونو ښوونې او روزنې ته جدي پاملرنه وکړي.
د یادولو وړ ده، چې یاد لومړنی ښوونځی شپږ درسي ټولګي د نورو اړینو لوازمو سره لکه: د اوبو څاه، لمریزې برېښنا سیستم، د سپورت میدان او ۱۰۸عدده میز، څوکیو او نور اړينو وسايلو سمبال دی، چې ټولټال ۱۶ ميلیونه افغانۍ لګښت پرې راغلی او په یوه وخت کې د ۳۰۰ تنو زده کوونکو د زده کړې ظرفیت لري.
