له ولایتونو څخه د پوهنې خبرونه
لغمان
د لغمان ولايت د پوهنې رئيس مولوي شاه جهان ساجد د ياد ریاست له کارکوونکو سره د يوې کاري غونډې پر مهال ديني مدارس یې د انسان جوړونې مرکزونه وبلل او له مسئولينو يې وغوښتل چې د دې سپېڅلو ځايونو رښتيني خدمتګاران واوسي. او له مراجعینو سره پر ښه چلند ټینګار وکړ او یو شمېر نور اړین موضوعات هم د دې غونډې په اجنډا کې شامل وو
نورستان
د نورستان ولایت د ښوونې او روزنې آمر د پوهنې وضعیت د څېړلو په موخه نورګرام، دوآب او منډول ولسوالیو ته ولاړ او د یادو ولسوالیو د ښوونیزو چارو له فعالیتونو څخه یې څارنه او ارزونه وکړه.
بلخ
د بلخ ولايت د پوهنې رياست سکتوري غونډه د یاد ریاست د ښوونې او روزنې د آمر تر څارنې لاندې د دې ولايت د ټولو دولتي ادارو او مرستندویو بنسټونو د استازو په ګډون جوړه شوه .
په دې ناسته کې د پوهنې په برخه کې د مرستندویو بنسټونو او ادارو مسئولینو د خپلو فعالیتونو راپورونه وړاندې کړل او د خپلو راتلونکو پلانونو د عملي کولو په موخه یې د بلخ د پوهنې له ریاست څخه د مرستو او اسانتیاوو د برابرولو غوښتنه وکړه.
همدا رنګه د بلخ ولایت د پوهنې رئیس الحاج مولوي عبدالجلیل شهیدخېل د یاد ریاست له اداري چارو او د کارکوونکو له حاضري څخه لیدنه وکړه. او له مراجعینو سره یې د کارکوونکو پر ښه چلند، اصولي کړنو او په رسمي ورځنیو چارو کې له غفلت څخه په ډډه کولو ټینګار وکړ.
د بلخ ولايت د پوهنې رياست وايي: د يونيسف مؤسسې له خوا مرسته شوې درسي توکي او قرطاسیه يې د دغه ولايت په مرکز او ولسواليو کې د پوهنې پر آمریتونو وېشلي دي.
د بلخ ولایت د پوهنې ریاست د املاکو عمومي مديريت د ولسوالیو د آمریتونو له مسئولينو سره غونډه وکړه او د املاکي کتابونو په اړه يې ورسره خبرې وکړې.
