له ولایتونو څخه د پوهنې لنډ خبرونه
پروان
د پروان ولایت پوهنې رئیس مفتي محمد حسن حقاني د دغه ولایت د مرکز او ولسوالیو له آمرینو او مدیرانو سره په کتنه کې له هغوی وغوښتل چې د پوهنې د چارو د ښه والي او په خپلو ادارو کې د شته ننګونو د حل لپاره جدي کار وکړي.
د پوهنې رئیس همدارنګه د ښوونیز کیفیت او د بیت المال پر ساتنې ټینګار وکړ.
له بلې خوا د یادو بنسټونو آمرینو په دې برخه د مرستو ژمنه وکړه او خپلې ستونزې يې د پوهنې له رئيس سره شريکې کړې.
لغمان
د پوهنې ریاست د ښوونې او روزنې آمر مولوي صدیق الله معتصم بالله په یوه کاري ناسته کې د ښوونځیو له آمرینو او د اړوندو ادارو له مدیرانو وغوښتل، چې د نوي نسل په روزلو کې اسلامي اصول په پام کې ونیسي او په دې برخه په اخلاص او صداقت کار وکړي.
نوموړي د غونډې ګډونوالو ته وويل، چې د کلنۍ ازموينې لپاره چمتووالی ونيسي.
د لغمان ولايت د پوهنې رياست د تعلیمي څارنې غړو په خپلو اړوندو سيمو کې د ښوونځيو او ديني مدارسو له تعليمي او اداري فعاليتونو څخه څارنه وکړه او پايلې يې د مرکز او ولسواليو د پوهنې له مسوولينو سره شريکې کړې.
ارزګان
د اروزګان د پوهنې ریاست د تعلیمي څارنې کارکوونکو د دغه ولایت په مرکز او ولسوالیو کې د یو شمېر ښوونځیو له ښوونیزو چارو څخه څارنه وکړه او د یادو ښوونځیو له ښوونکو سره یې د ستونزو د حل او د چارو د ښه والي په موخه جلا جلا ناستې وکړې.
