له ولایتونو څخه د پوهنې خبرونه
ارزګان
د ارزګان ولایت د پوهنې رئیس الحاج مولوي کامران آخندزاده او ورسره پلاوي د دغه ریاست له مرکزي څانګو څخه لیدنه وکړه، د اداري اسنادو د ارزونې او د کارکوونکو له شتون څخه یې د لیدنې ترڅنګ د کاري ډسپلین پر ټینګښت ټینګار وکړ.
فراه
د فراه ولایت د پوهنې ریاست مسوولین وايي: له ۴۴۰ تنو مجاهدینو څخه د سویې ازموینه واخیستل شوه.
د دغه ولايت پوهنې رئيس مولوي اختر محمد زعيم وويل، چې د ازموينې له ترسره کېدو يې موخه د زده کړو د کچې لوړول دي.
د نوموړي په وینا په پام کې ده، چې د دې بهیر بريالي شوي نوماندان د ښوونځيو په لسم، يوولسم او دولسم ټولګيو کې جذب شي.
کندز
د کندز ولایت د پوهنې رئیس الحاج مولوي محمد اسماعیل ابواحمد د دغه ولایت چهاردرې او امام صاحب ولسوالیو ته د یوه کاري سفر په ترڅ کې د یادو ولسوالیو د پوهنې ریاستونو د فعالیتونو د څارنې ترڅنګ له زده کوونکو سره هم وکتل.
لغمان
د لغمان د پوهنې ریاست د تعلیمي څارنې غړو د دغه ولایت د مرکز مهترلام ښار او د دولت شاه، الینګار، الیشنګ او قرغیو ولسوالیو د یو شمېر ښوونځیو له ښوونیزو او اداري چارو څخه لیدنه وکړه او اړوندو مسوولینو ته یې د فعالیتونو د لا ښه والي په موخه لارښوونه وکړه.
کندهار
د کندهار ولایت د تخته پول ولسوالۍ د پوهنې آمریت د یوې کاري غونډې په ترڅ کې له خپلو مسوولینو او کارکوونکو وغوښتل، چې د دیني اصولو او ارزښتونو په رڼا کې خلکو ته خدمتونه وړاندې کړي.
