د ننګرهار له پوهنې ریاست څخه خبرونه
د ننګرهار د پوهنې رئیس مفتي حبیب حضرت حقاني د دغه ولایت په مرکز او ۲۲ ولسوالیو کې د پوهنې او د تعلیمي څارنې له آمرینو وغوښتل، چې د خپلو اړوندو ښوونځیو له اداري او تدریسي چارو څخه څارنه وکړي، د زده کوونکو او ښوونکو ستونزې وڅېړي. او پایلې یې د پوهنې له ریاست سره شریک کړي.
د ننګرهار پوهنې رئیس په ولایتونو کې د پوهنې له رئیسانو سره د پوهنې وزارت له خوا په جوړ شوي ویډیويي کنفرانس کې ګډون وکړ.
په دغه ویډیو کنفرانس کې له مرستندویو بنسټونو سره په هوکړه لیکونو، لایحو، کاري شرایطو او د یادو بنسټونو د نورو کارونو او فعالیتونو په باب بحث او پرېکړې وشوې.
د ننګرهار پوهنې رياست وايي: په ننګرهار ولايت کې د پوهنې خواخوږو د ښيوې ولسوالۍ د اصحاب بابا د منځني ښوونځي د زده کوونکو لپاره درې درسي ټولګي جوړ کړي او د يادې ولسوالۍ د زده کوونکو ستونزې يې هوارې کړې دي.
د پوهنې ریاست مشرتابه د دې خواخوږو شخصیتونو د دې کړنې د ستاینې په ترڅ کې له نورو هېوادوالو وغوښتل چې د دغه ډول کړنو په ترسره کولو سره د پوهنې په پرمختګ کې فعاله ونډه واخلي.
په ننګرهار ولایت کې یوه خصوصي شرکت د روژې د مبارکې میاشتې په مناسبت د دغه ولایت د سره رود ولسوالۍ د مومن آباد د منځني ښوونځي ښوونکو ته ۵۴ زره افغانۍ مرسته وکړه.
