د پکتیکا له پوهنې ریاست څخه خبرونه
د پکتیکا ولایت د پوهنې رئیس الحاج مولوي عبدالقیوم فاروقي د نوي ښوونیز کال د وړاندیز شویو پلانونو د عملي کولو په موخه د ښوونځیو له آمرینو سره غونډه وکړه.
نوموړي د تدریسي بهیر د ښه والي، پر وخت د اصولي اجرااتو او دندو ته د درناوي او ژمنتیا په باب خبرې وکړې.
له بلې خوا د ښوونځيو مسوولينو د يادو شويو مواردو د منلو په ترڅ کې د پوهنې رياست له مشرتابه څخه وغوښتل چې د ښوونځيو د شته ستونزو د حل کولو په برخه کې ورسره لازمې هلې ځلې وکړي .
د پکتیکا ولایت د پوهنې رئیس په صدیقیه حماسیه دارالعلوم کې د نیالګیو اېښودلو په کمپاین کې د ګډون پرمهال د خپلو خبرو په ترڅ کې د نیالګیو اېښودل یې د چاپېریال په زرغونتیا، پاکې هوا او د چاپېریال په ښکلا کې ګټور وباله. او له خلکو يې وغوښتل چې په خپلو کورونو او سیمو کې نيالګي کېنوي.
د پکتیکا پوهنې ریاست د یوې کمېټې په جوړولو سره د دې ولایت په بېلابېلو برخو کې د قراردادي ښوونکو لپاره د ازموینې بهیر پیل کړ.
د دې پروسې په بشپړیدو سره به د مرکز او ولسوالیو په ښوونځیو کې په سلګونو بالمقطع ښوونکي وګمارل شي.
د پکتیکا ولایت د پوهنې رئیس او ورسره پلاوي د دغه ولایت د پوهنتون له نوي ټاکل شوي رئیس مولوي شبیر احمد عباس سره په لیدنه کې په دغه ولایت کې د یادو دوو تعلیمي او تحصیلي بنسټونو د ستونزو د حل په برخه کې د هر اړخیزو همکاریو په باب خبرې وکړې.
په پای کې دواړو لورو د دواړو بنسټونو پر همکارۍ او همغږۍ ټینګار وکړ.
