د کندهار له پوهنې ریاست څخه خبرونه
د کندهار ولايت د پوهنې رياست اداري غونډه د دغه رياست د سواد زده کړې د آمر حافظ حکمت الله مدبر په مشرۍ جوړه شوه.
په دې غونډه کې چې د کندهار د مرکز او ولسواليو د سواد زده کړې مديرانو هم برخه لرله، د سواد زده کړې آمر د انسان په ژوند کې د سواد او زده کړې پر ارزښت خبرې وکړې او له ګډونوالو يې وغوښتل چې د نوي ښوونیز کال لپاره خپل پروګرامونه او کاري پلانونه چمتو کړي.
همدا ډول لارښوونه وشوه، چې د دغه ولایت د سواد زده کړې ټولګي وڅېړل شي او د هغوی د تقوا او کاري تجربو له مخې د کارکوونکو د استخدام او ګمارنې په برخه کې اقدام وشي.
د کندهار ولایت د تخته پول ولسوالۍ د پوهنې آمر د دې ولسوالۍ د ښوونځیو له آمرینو او مدیرانو سره ناسته وکړه او د پوهنې بهیر د ښه والي او د تدریسي چارو د ستونزو د حل په موخه یې ورسره خبرې وکړې.
هغه له ګډونوالو وغوښتل، چې د دغه وزارت له لارښوونو او طرزالعملونو سره سم خپلې ورسپارل شوې چارې ترسره کړي.
د دغه ولایت د دیباغ په کلي کې له صدیقې مدرسې څخه ۲۵ تنه فاضلان د قرانکریم د حفظ له دورې څخه او د یو لړ مراسمو په ترڅ کې فارغ شول.
په دې مراسمو کې ديني عالمانو د مبارکۍ ترڅنګ له خلکو وغوښتل، چې د ټولنې د اصلاح او پرمختګ په موخه خپل اولادونه د علم او پوهې په ګاڼه سينګار کړي.
په کندهار ولایت کې د النور له دارالحفاظ څخه ۱۴ تنه د قرآن کریم حافظان فارغ شول.
د فاضلانو د فراغت په مراسمو کې ويناوالو په ټولنه کې د ديني عالمانو د مقام او د خلکو په ژوند کې د دیني علومو پر ارزښت خبرې وکړې او له فارغانو يې وغوښتل چې د خلکو او هېواد د خدمت لپاره جدي هڅې وکړي.
د نېش ولسوالۍ د پوهنې او د تعلیمي څارنې مسوولینو د فیض القرآن،حقانیه او الهامیه مدارسو له ښوونیزو او اداري فعالیتونو څخه څارنه وکړه او د یادو ادارو له مسوولینو او د دې سیمې له مشرانو سره یې وکتل او د پوهنې ریاست د پلانونو د تطبیق په اړه یې ورسره خبرې وکړې.
