د پوهنې وزارت د اداري مجلس دولسمه غونډه ترسره شوه
د پوهنې وزارت د اداري مجلس دولسمه غونډه د یاد وزارت د سرپرست وزیر الحاج مولوي حبیب الله آغا په مشرۍ او د معینانو او مرکزي رئیسانو په غړیتوب، ترسره شوه.
غونډه د قرآن عظیم الشان د څو مبارکو آیاتونو په تلاوت سره پیل او بیا له آجنډا سره سم پر موضوعاتو بحث پیل شو.
په یاده غونډه کې د سرچینو او ادارې د معین شیخ مولوي سعید احمد شهیدخیل په مشرۍ او د مالي او حسابداري او نظارت او ارزیابي ریاستونو د رئیسانو په غړیتوب درې کسیز هیئت ته دنده وسپارل شوه، تر څو د هیواد په بیلا بیلو ولایاتو کې د ځینو بانکونو له لورې د معیاري خدمتونو د نه اجراء او په ولسوالیو کې د بانکونو د اړوندو څانګو د نه موجودیت له امله د پوهنې وزارت کارکوونکو او ښوونکو ته د ور پېښو ستونزو د حل لپاره یوه طرحه جوړه او د یاد وزارت راتلونکي اداري مجلس ته یې د بحث او منظوري لپاره وړاندې کړي.
د ښوونې او روزنې د معین الحاج مولوي سخاء الله سعید په مشرۍ هیئت ته دنده وسپارل شوه، ترڅو د تعلیمي مراکزو د نوم د تغیر په اړه د ریاست الوزراء د محترم مقام د ۱۵/۶/۱۴۴۴هـ.ق نېټې د (۱۸۶۸) ګڼه حکم او د نومونو د تغیر په اړه د پوهنې وزارت د اړوندو مقرراتو په نظر کې نیولو سره یوه طرحه ترتیب کړي، تر څو د دفتر د عمومي ریاست له لورې د ریاست الوزراء محترم مقام ته د منظوري په موخه ولېږل شي.
همدارنګه دې ته ورته د ځینو نورو مسایلو په اړه هم تفصیلي بحثونه او پرېکړې ترسره شوې.
