له ولایاتو څخه د پوهنې لنډ خبرونه
کاپیسا:
د ډاکار موسسې سیمه ییز دفتر د کاپیسا ولایت د حصه اول والسوالۍ د لس بابه ښوونځیو د شوراګانو د غړو لپاره درې ورځنی روزنیز ورکشاپ جوړ کړ.
د دې ولایت د پوهنې رئیس مولوي محمد فرید حقاني د ډاکار موسسې له مرستو څخه مننه وکړه او له ګډونوالو یې وغوښتل چې د دغه ښوونیز پروګرام له موادو څخه ښه ګټه پورته کړي او د اداري چارو د لا ښه والي په موخه هر اړخیزه مرسته وکړي.
کندهار:
د کندهار ولايت د پنجوايي والسوالۍ د پوهنې د ښوونیز څارنې آمرین هر یو مولوي محب الله سعادت او مولوي ماهر د دې ولايت په مرکز کې د دستګيري مدرسې له اداري او تدريسي بهير څخه ليدنه وکړه او مديران يې له خپلو جدي مسووليتونو خبر کړل.
لغمان:
د لغمان ولایت د الینګار والسوالۍ د جامعه اسلامیه حنیفه د قرآن کریم له دورې څخه ۱۶ تنه حافظان او ۳۵ تنه ناظره لوستونکي فارغ شول.
د فراغت په مراسمو کې ګڼ شمېر دیني عالمانو او د فارغانو د کورنیو غړو برخه اخیستې وه.
یادو فارغینو ته د مبارکۍ ورکولو په ترڅ کې هر یوه ویناوال د قرآن کریم د زده کړې په ارزښت او د نورو دیني او عصري علومو د زده کړې پر اهمیت خبرې وکړې.
ننګرهار:
د ننګرهار د پوهنې ریاست ویاند فرهاد احمد ستانکزي په هغه غونډه کې چې د دغه ولایت د مهاجرینو او راستنیدونکو چارو ریاست په مشرۍ جوړه شوې وه پر مرستندویه ادارو او نورو بنسټونو یې غږ وکړ چې د پوهنې په برخه کې مرسته وکړي، ترڅو راستنیدونکو ماشومانو ته د زده کړو زمینه برابره کړي.
بلخ:
د بلخ ولايت د چهاربولک والسوالۍ د پوهنې آمر قاري جمشيد ابو سهيل د منصورالمدارس د مدرسې او دارالحفاظ له تدريسي بهير څخه ليدنه وکړه او د مدرسې مشرتابه او زده کوونکو ته يې د تدریس د ښه والي په موخه لازمې لارښوونې وکړې.
