له ولایاتو څخه د پوهنې لنډ خبرونه
سرپل:
د هېواد د پوهنې په برخه کې د خلکو د مرستو په دوام، دا ځل د سرپل ولایت د سانچارک والسوالۍ د پوهنې د مینه والو یوې ډلې د دغې والسوالۍ د دویم نمبر لېسې لپاره یې د ۱۰۰ زره افغانیو مرسته وکړه، ترڅو د یادې لېسې ستونزې پرې حل شي.
د دې لېسې مدیر د سانچارک له خلکو څخه د مننې په ترڅ کې له ملي سوداګرو او شتمنو خلکو وغوښتل چې د دغه ولايت د پوهنې له رياست سره په خپلو مرستو د زده کوونکو لپاره د لا ښې زده کړې زمينه برابره کړي.
همدارنګه:
د دې لېسې ادارې د فارغانو لپاره د شهادتنامو د وېش مراسم تر سره کړل او د ګډونوالو په حضور کې يې د ښوونيزو مطالبو د خپرولو په موخه د «اسلامي نظام د ملاتړ» تر نامه لاندې يوه مجله هم په لاره واچوله.
بادغیس:
د بادغيس ولايت د پوهنې رئيس مولوي محب الله احسان د خصوصي ښوونیزو بنسټونو له مسوولينو سره د يوې غونډې په ترڅ کې د يادو بنسټونو د تدريس د څرنګوالي او د جواز ترلاسه کولو پر لارو چارو د بحث په ترڅ کې له هغوى وغوښتل، چې د پوهنې وزارت له لارښوونې سره سم د نجونو له کورسونو څخه څارنه وکړي. .
لوګر:
له لوګر ولایت څخه هم په خپره شوې خبرپاڼه کې ویل شوي، چې د حاجي منګل احمدزي خیریه بنسټ د لوګر ولایت د مرکز په غیرت آباد کلي کې د یوه ښوونیز مرکز په جوړولو سره ۴۳۰ ماشومانو ته د وړیا زده کړو زمینه برابره کړې ده.
د دغه ښوونيز مرکز د پرانيستې په مراسمو کې د دغه ولايت د پل علم ښار د پوهنې آمر حبيب نور حيدري د ياد شوي خيريه بنسټ له مشرتابه څخه د مننې په ترڅ کې له نورو خلکو او بنسټونو وغوښتل، چې له پوهنې سره مرسته وکړي.
لغمان:
د لغمان ولایت د الیشنک والسوالۍ د پوهنې د څارنې غړو د څلور نیم میاشتنیو ازموینو په اړه لازمې لارښوونې وکړې او د دغو ښوونیزو بنسټونو له اداري او تدریسي چارو څخه یې څارنه وکړه.
د مسوولينو په وينا: د حل په موخه يې استادانو او مسوولينو ته لازمې مشورې ورکړل شوې.
خوست:
په خوست ولايت کې د يونيسف د سيمه ييز دفتر په مالي لګښت او د دغه ولايت د پوهنې رياست د انجينري ټيم په مرسته د دغه ولايت د تڼيو والسوالۍ د کوچيانو لېسې د حلقوي دیوال کار بشپړ او ګټې اخيستنې ته وسپارل شو.
