له ولایاتو څخه د پوهنې لنډ خبرونه
لغمان:
د پوهنې وزارت د اسلامي زده کړو معین الحاج مولوي کرامت الله اخندزاده لغمان ولایت ته د یوه رسمي سفر په ترڅ کې له جهادي مدرسې څخه لیدنه وکړه او د دغه مدرسې اداري، تدریسي او مالي اسنادونه یې وڅېړل او د دغه ولایت د پوهنې له مسوولینو یې وغوښتل چې د دغه ولایت د پوهنې د ښه والي په برخه کې د ښوونځیو او مدارسو تدریسي کیفیت ته خاصه پاملرنه وکړي.
نوموړي د لغمان د پوهنې ریاست د زده کوونکو د علمي سویې په ارزولو سره د دې ولایت د پوهنې د رئیس او نورو کارکوونکو د هڅو ستاینه وکړه.
جوزجان:
د جوزجان ولایت په اقچې ولسوالۍ کې د رقیه البنات مدرسه پرانیستل شوه.
د دغه مدرسې د پرانیستلو په مراسمو کې ګڼ شمېر سیمه ییزو چارواکو، د پوهنې ریاست مسوولینو، دیني عالمانو او د سیمې خلکو برخه اخیستې وه.
د جوزجان ولايت د پوهنې رئيس مولوي محمد طاهر جواد په دغه ولايت کې د نجونو لپاره د ديني مدرسې د پرانيستلو هرکلى وکړ او دا يې نیک اقدام وباله.
د جوزجان ولايت دآقچې ولسوالۍ دحقاني مدرسې بنسټګر مولوي محمدالله حقاني وايي: دغه مدرسه د څه دپاسه ٣٦٠٠ متر مربع ځمکې په ساحه کې په يو پوړ کې په پاخه او اساسي ډول د لسو مياشتو په موده کې جوړ شوې ده.
ويل کيږي چې د دغه مدرسې په جوړولو څه دپاسه پنځلس ميليونه افغانۍ لګښت راغلى او د جوزجان ولايت د امنيه قومندان قاري حفيظ الله پهلوان له خوا یې ټولې پیسې ورکړل شوي دي
کاپیسا:
دکاپيسا ولايت د نجراب ولسوالۍ په حضرت فرخ شاه لېسه کې د پوهاوي د پروګرام په لاره اچولو سره د ډاکار موسسې مسوولينو له زده کوونکو او د سيمې له خلکو وغوښتل چې د چاپيريال، ښوونځي، کور او ماشومانو په نظافت او پاک ساتلو کې پوره زيار وباسي.
د دې ولايت د پوهنې ریاست تدریسي مرستیال استاد خان آغا هارون د اسلام له نظره د پاکوالي په ارزښت خبرې وکړې او د يادې ادارې له کارکوونکو يې مننه وکړه.
کندهار:
د SHAO موسسې مسوولینو د کندهار ولایت د پوهنې له مسوولینو سره په همغږۍ د دې ریاست د ولسوالیو د پوهنې د آمرینو او مدیرانو لپاره د ظرفیت لوړونې پنځه ورځنی سیمینار جوړ کړ.
د كندهار د پوهني رياست د ښوونې او روزنې آمر مولوي محمد حسن شاه آغا له ګډونوالو څخه وغوښتل چي د دغه سيمينار له محتوا او موادو څخه په خپلو درسي او اداري دندو كي پوره، پوره ګټه پورته کړي.
نورستان:
په نورستان ولایت کې د یونیسف د ولایتي دفتر مسوولینو د دغه ولایت د پوهنې له رئیس تاج محمد مطمین سره وکتل او په نورستان کې یې د پوهنې په برخه کې د خپلو کاري پلانونو په اړه معلومات ورکړل.
ښاغلي مطمین د نورستان له معارف سره د یونیسف د دوامداره اداري مرستو د مننې په ترڅ کې د دې ادارې له مسوولینو وغوښتل چې د دغه ولایت له پوهنې سره خپلې ژمنې عملي کړي.
