له مرکز او ولایاتو څخه د پوهنې لنډ خبرونه.

لوګر:
د حضرت عمر فاروق(رض) خیریه بنسټ  په لوګر ولایت کې د شلو دیني مدارسو او یو شمېر ښوونځیو لپاره د پاکو اوبو څاګانې وکیندلې. چې د دغو څاګانو په کیندلو سره به د زرهاو زده کوونکو او ښوونکو ستونزې هوارې شي.
 د يادونې وړ ده، چې د يونيسف ادارې هم په دغه ولايت کې د لسو ښوونځیو لپاره یې ژورې څاګانې وکیندلې.
د لوګر ولايت د پوهنې رئيس مولوي جنت ګل عزيز د يادو بنسټونو له مرستو څخه د مننې ترڅنګ د هېواد له پوهنې سره د لا زياتو مرستو د دوام غوښتنه وکړه.
کندهار:
د کندهار ولايت د پوهنې رياست چارواکي وايي: د حج او اوقافو د رياست په استازيتوب درې ديني عالمان د دې ولايت د محمود طرزي لېسې ته ورغلل او د دې لېسې زده کوونکو ته يې ديني لارښوونې وکړې، او یادونه یې وکړه چې زده کوونکي باید د اسلامي شریعت سره سم خپل صورت او سیرت جوړ کړي.  
د مسوولينو د څرګندونو له مخې: د يادې شوې لېسې زده کوونکو د دغو ديني لارښوونو له ترلاسه کولو څخه د خوښۍ په څرګندولو سره ژمنه وکړه چې خپلې ټولې چارې به د اسلامي احکامو په رڼا کې تنظيموي.
کابل:
د کابل ولایت د ده سبز ولسوالۍ د پوهنې آمر او د ښوونیز څارنې آمر د شګوفان شمال خصوصي عالي لېسې اري چارې یې وڅېړلې او د پوهنې د کیفیت د ښه والي په موخه یې مسؤلینو ته لازمې لارښوونې وکړې.
بادغیس:
د بادغیس ولایت د علماوو شورا مرستیال مولوي غلام محمد موحدي او ورسره مل پلاوي د دغه ولایت د پوهنې ریاست له رئیس او کاري پرسونل سره یې جلسه وکړه او د علم او پوهې پر ارزښت باندې یې خبرې وکړې او له ټولو یې وغوښتل، ترڅو د ښوونې او روزنې په پیاوړتیا کې تر خپله وسه کار وکړي.
خوست:
د IRC استازو د خوست ولایت د پوهنې ریاست له مسوولینو سره وکتل او په دغه ولایت کې یې د خپلو راتلونکو کاري پلانونو په اړه معلومات ورکړل.
د يادې شوې ادارې استازو د خوست د پوهنې له مسوولينو وغوښتل، چې د نوي کال لپاره خپلې اړتياوې له دوى سره شريکې کړي،ترڅو په خپلو پلانونو کې يې شامل کړي. د دې ولايت د پوهنې مسوولينو د دې ادارې له مرستو څخه د مننې په ترڅ کې د دې رياست جدي اړتياوې یې له هغوى سره شريکې کړې.