د سرپل ولایت په مرکز کې د ښوونځیو له زده کوونکو څخه د سیرت النبي (ص) ازموینه واخیستل شوه.
د سرپل ولایت د پوهنې ریاست له خوا د وړاندې شوي پلان له مخې د دغه ولایت د مرکز د ښوونځیو له زده کوونکو څخه د سیرت النبي ازموینه واخیستل شوه.
په دې ازموینه کې ټولټال ۱۱۰۰ نارینه او ښځینه زده کوونکو برخه اخیستې وه.
د دغه ولايت د پوهنې رئيس مولوي محمد رحماني د يادې ازموينې له بهير څخه د کتنې په ترڅ کې د دې ازموينې له ترسره کېدو څخه د خوښۍ څرګندولو په ترڅ کې وويل: د دې ازموينې له پيلولو څخه يې موخه د زده کوونکو هڅونه او مطالعې سره عادت ورکول دي. ځوانان باید د ستر پیغمبر (ص) له ژوند، نیکو اخلاقو او سترو کارنامو څخه پوره معلومات ترلاسه کړي.
د سرپل ولایت د پوهنې ریاست په پام کې لري، چې د دې ازموینې پایله د مسوولو غړو له هر اړخیزې ارزونې وروسته اعلان کړي.
زده کوونکو د دې ازموينې ترسره کول د دغه ولايت د پوهنې رياست له خوا يو ښه او د قدر وړ اقدام وباله او تود هرکلى يې وکړ.
دوی وویل چې د پیغمبر (ص) له سیرت څخه خبرېدل د ځوانانو په کړنو، اخلاقو او له حرامو څخه د هغوی د مخنیوي او د ټولنې په اصلاحي برخو کې ډېر اړین دي.
د یادولو وړ ده چې د سرپل ولایت د پوهنې ریاست په پام کې لري چې ممتازو زده کوونکو ته له لومړي تر لسمې درجې پورې جایزې ورکړي. لکه؛ بایسکل، کمپیوټر، د قرانکریم صوتي او نور وړ شیان.
