له کابل او کاپیسا څخه د پوهنې خبرونه
- کابل:
د کابل ولایت د پوهنې ریس مولوي عبدالحق حقاني او ملګرو یې د دغه ولایت په قره باغ ولسوالۍ کې د اکاخېلو دیني مدرسې او عمریه شرعیه دارالعلوم د زده کوونکو له اداري، تدریسي او ښوونیزو چارو څخه څارنه او کتنه وکړه.
- د یو بل خبر له مخې:
د کابل ولایت د استالف ولسوالۍ د پوهنې آمر ملا شرفت الله اخندزاده د دې ولسوالۍ د ښوونځیو له مسوولینو سره غونډه وکړه. نوموړي له يادو مسوولينو وغوښتل، چې په خپلو ښوونځيو کې دې د راتلونکو کلنيو ازموينو لپاره لازم چمتووالى ونيسي او د ازموينو پر مهال دې د عدالت او انصاف اصول په پام کې ونيسي.
- همدا ډول:
د کابل ولایت د شکردرې ولسوالۍ د پوهنې آمر مولوي ایام الدین حماسي د حاجي پیک له ښوونځي څخه لیدنه وکړه.
- کاپیسا:
د کاپيسا د پوهنې رياست د ښوونې او روزنې مرستيال استاد خان اغا هارون د محمود راقی هلکانو عالي لېسې له اداري او تدريسي چارو ليدنه وکړه، زده کوونکو ته يې د علم د زده کړې او د دې لېسې مسوولينو ته د چارو د لا ښه والي په موخه لارښوونې وکړې.
- په یو بل خبر کې:
د یونیسف دفتر د کاپیسا ولایت د اله سای ولسوالۍ د ۶۰ ښوونځیو ښوونکو ته لس ورځنی ښوونیز سیمینار جوړ کړ. د پوهنې ریاست د ښوونې او روزنې مرستیال استاد خان اغا هارون د یونیسف ادارې له مرستو څخه د مننې ترڅنګ له ګډونوالو وغوښتل چې د دغه سیمینار له موادو او محتوا څخه سمه ګټه پورته کړي
- په ورته ډول:
د کاپیسا ولایت د پوهنې ریاست د ساینس او ټکنالوژۍ مدیریت مسلکي غړو د دغه ولایت د نجراب او تګاب ولسوالیو د یو شمېر ښوونځیو له لابراتوارونو څخه لیدنه وکړه او د دغو لابراتوارونو له استادانو سره یې د خپلو تجربو د شریکولو په ترڅ کې له هغوی څخه وغوښتل چې د زده کوونکو د ښه پوهاوي په موخه له شته امکاناتو څخه ستره ګټه پورته کړي.
