دلوړو زده کړو سرپرست وزیر دپوهنې له سرپرست وزیر سره وکتل
د ا.ا.ا. د لوړو زده کړو سرپرست وزیر شیخ مولوي عبدالباقي حقاني دپوهنې وزارت له سرپرست وزیر الحاج مولوي حبیب الله آغا سره وکتل.
په یاده لیدنه کې محترم شیخ حقاني صاحب لومړی دپوهنې وزارت سرپرست وزیر ته د نوې دندې مبارکي وویله او د الله تعالی له دربار څخه یې ورته په ورسپارل شوي مسئولیت کې د توفیق غوښتنه وکړه.
ورپسې الحاج مولوي حبیب الله آغا محترم شیخ حقاني صاحب ته ښه راغلاست ووایه او د نوموړي د راتګ له امله یې ورڅخه مننه وکړه. محترم آغا صاحب زیاته کړه د پوهنې وزارت د چارو سنبالول یقینا یوه ستونزمنه چاره ده، یوازې د الله تعالی په نصرت او ستاسې په څیر مخلصو ملګرو د دعاوو او نېکومشورو په برکت به دغه دروند بار پورته کوو.
محترم شیخ حقاني صاحب د خپلو خبرو په ترڅ کې دپوهنې وزارت د هیواد یو له کلیدي وزارتونو او محترم آغا صاحب د یاد وزارت د چارو د سنبالولو لپاره وړ کس وګاڼه او ژمنه یې وکړه چې نوموړی به له آغا صاحب څخه خپلې مخلصانه مشورې نه سپموي او وخت په وخت به د نوموړي په خدمت کې حاضرېږي.
