د پوهنې وزارت د منابع او ادارې سرپرست معین معرفي شو
محترم شیخ سعید احمد شهید خیل د پوهنې وزارت د منابع او ادارې سرپرست معین په توګه د پوهنې وزارت د سرپرست وزیر ښاغلي شیخ مولوي نورالله منیر او د چارو د ادارې مرسیال محترم مولوي سیف الدین لخوا د یاد وزارت مسوولینو او کارکوونکو ته ور وپیژندل شو.
په هغه غونډه کې چې له دې امله د پوهنې وزارت د کلوپ په تالار کې جوړه شوې وه د پوهنې وزارت سرپرست وزیر ښاغلي شیخ مولوي نورالله منیر، د چارو د ادارې مرستیال محترم مولوي سیف الدین ، د پوهنې وزارت د تضمین کیفیت معین محترم مولوي عبدالخالق صادق ، د پوهنې وزارت د دفتر مقام لوی رئیس محترم مولوي عبدالحکیم همت اخندزاده ، د پوهنې وزارت رئیسانو، کارکوونکو او یو شمیر میلمنو ګډون کړی وو.
غونډه د محترم مولوي فضل الرحمن لخوا د قرآن عظیم الشان د څو مبارکو آیاتونو په تلاوت سره پیل شوه ورپسې محترم مولوي عبدالحکیم همت اخندزاده ګډون والو ته د خپلې ارزښتناکه وینا په لړ کې د پوهنې وزارت تاریخچه بیان کړه وروسته محترم مولوي عبدالخالق صادق خبرې وکړې او د اسلام په رڼا کې یې د تعلیم او تربیې ارزښت او ګټې بیان کړې. ورپسې محترم مولوي سیف الدین خبرې وکړې او د پوهنې وزارت د منابع او ادارې د سرپرست معین په توګه یي د ښاغلي شیخ سعید احمد شهید خیل د ټاکل کیدو په اړه د افغانستان د اسلامي امارت د امیرالمومنین فرمان ولوست او محترم شیخ صاحب ته یې د دې دروند مسوولیت د ورسپارلو په اړه مبارکي وویله. وروسته ښاغلي شهید خیل خبرې وکړې او ډاډ یې څرګند کړ چې په خپل ټول توان او قدرت سره به د دې ځوریدلي ملت بچیانو ته د ښې ښوونې او روزنې چارې برابر وي. غونډه د پوهنې وزارت د سرپرست وزیر ښاغلي شیخ نورالله منیر لخوا د دعایې په لوستلو سره پای ته ورسیده.
