د هرات ولایت ادرسکن ولسوالۍ کې د ۲۴ ښوونځیو ودانۍ پرانیستل شوې
پوهنې وزارت، هرات: د هرات ولایت ادرسکن ولسوالۍ کې د ۲۴ ښوونځیو ودانۍ د یاد ولایت والي زاهد عبدالوحید قتالي، د پوهنې رئیس ذکريا رحیمي ، د دولتي ادارو یو شمیر چارواکو، قومي مشرانو، ښوونکو او زده کوونکو په شتون سره پرانیستل شوې او ګټې اخیستنې ته وسپارل شوې.
د یادو ښوونځیو پرانیستغونډه کې د هرات والي د یادو ودانیو د پرانیستې په پار د هرات اولس ته د مبارکۍ ویلو ترڅنګ زیاته کړه: په هیواد کې د شته ستونزو د حل یوازینۍ بنسټیزه لار، د تعلیم او زده کړې لار ده او په دې برخه کې د پوهنې وزارت هلې ځلې د ستایلو وړ دي.
همدا راز د پوهنې رئیس ذکریا رحیمي په لیرې پرتو او محرومو سیمو کې د زده کړې پر پراختیا خبری وکړې، زیاته یې کړه : نن ورځ موږ او تاسو د ۲۴ ښوونځیو ودانۍ پرانیستلې او ډیر ژر به د هغو ۳۴ ښوونځیو ودانیزې چارې هم بشپړې شي چې په همدې ولسوالۍ کې د اقرا برنامې له لارې جوړیږي.
هیره دې نه وي، چې یاد شوي ۲۴ ښوونځي د ادرسکن ولسوالۍ په لیرې پرتو کلیو کې د اقرا برنامې له لارې د ۱۷ میلیونه افغانیو په لګښت جوړ شوي ، چې په جوړیدو سره یې شاوخوا ۹ زره زده کوونکي د زده کړو خوندي چاپیریال څخه برخمن شول.
