هرات ولایت کې د دوو ښوونځیو نوې ودانۍ پرانیستل شوې
پوهنې وزارت، هرات: دهرات ولایت کشک رباط سنګي ولسوالۍ کې د ابو ایوب انصاري او شهید عرفاني لومړنيو ښوونځيو ودانۍ د یو لړ مراسمو په ترڅ کې د هرات والي سید عبدالوحید قتالي، د پوهنې رئیس ذکریا رحيمي، د دولتي ادارو ځينې چارواکو قومي مشرانو، ښوونکو او زده کوونکو په ګډون سره پرانيستل شوې، د دې ترڅنګ د مولوي عبدالقدوس امیني په نامه یو نوى ښوونځي هم د يادې ولسوالۍ اوسيدونکو ته پرانيستل شو.
د پرانيستې په ترڅ کې د هرات والي وويل: د ښوونې او روزنې پرمختګ او ثبات، د پوهنې د پراختیایې بنسټونو په رامینځته کولو کې اړین دي ، موږ د تل په څيرد پوهنې ملاتړ ته ژمن يو او د پوهنې پرمختګ لپاره به هر ډول هلې ځلې کوو.
همداراز د پوهنې رئیس زياته کړه: په ۱۳۹۹ کال کې د رباط سنګي ولسوالۍ د پوهنې په برخه کې د ښوونځیو رغونې ۱۴ پروژې پلې شوې دي، نوموړي ۱۴۰۰ ښوونیز کال د ولسوالیو ښوونې او روزنې ته د پاملرنې کال وباله.
د کشک رباط سنګي ولسوالۍ د ابو ایوب انصاري او شهید عرفاني لومړنيو ښوونځيو ودانۍ د اقرا پروژې له لارې د ۱۲ میلیونه او ۶۰۰ زره افغانیو په لګښت، دولس ټولګيو او ۷۸۰ او ۶۵۰ متر مربع زیر بنا په درلودلو سره په پاخه او اساسي ډول جوړې شوې دي.
