د هیواد په کچه د ښوونځیو ښوونکو ته د کوویډ-۱۹ واکسین د لګولو لړۍ پیل شوه
د هیواد په کچه د ښوونکو ته د کووید ۱۹ واکسین د لګولو بهير د کابل ښار په الفتح عالي لیسې کې د پوهنې وزارت سرپرستې آغلې رنګینې حمیدي، د عامې روغتیاوزارت سرپرست ښاغلي ډاکټر وحيد مجروح ، د یونیسف او د روغتيا نړیوال سازمانونو د استازو په ګډون سره پیل شو.
د پوهنې وزارت سرپرستې آغلې رنګینې حمیدي، د ښوونځیو ښوونکو ته د واکسین لګولو د بهير د پيلولو په پار، د افغانستان له حکومته او د عامې روغتیا وزارت له مشرتابه څخه د مننې ترڅنګ ژمنه وکړه، چې د کرونا وايروس په برخه کې د عامه پوهاوي بهير به له روغتیا وزارت سره په همغږۍ کې ترسره کوي.
په افغانستان کې د روغتیا نړيوال سازمان او د یونیسف ادارې استازو ، د کوویډ-۱۹ واکسین د پلي کیدو په اړه ګډونوالو ته معلومات ورکړل او په دې برخه کې یې د افغانستان حکومت سره د خپلو همکاریو د دوام ژمنه وکړه.
د عامې روغتیا وزارت سرپرست په هیواد کې د پوهنې رول حیاتي او خورا ګټور وباله او زیاته یې کړه: "افغانستان یوازینی هیواد دی چې په پیل کې روغتیایي کارکوونکي، د ښوونځيو او پوهنتونونو استادان، د هیواد امنیتي او دفاعي ځواکونه او د رسنیو غړو ته د کرونا وايروس واکسين لګوي. نوموړي زياته کړه: په پيل شوې لړۍ کې به د هیواد په کچه د ښوونځیو او پوهنتونونو شاوخوا څلور سوه زره تنه استادان واکسین شي.
