د لوګر ښوونکو ته د ظرفیت لوړولو ورکشاپ پیل شو
د پوهنې وزارت، لوګر: د لوګر ولایت د خوښۍ ولسوالۍ د ۲۲ ښوونځیو ۵۳ تنو ښوونکو ته د ظرفیت لوړولو په موخه پنځه ورځنۍ روزنیز ورکشاپ پیل شو.
یاد ورکشاپ د پوهنې ریاست د لارښوونې له مخې د ښوونیزې څارنې او ارزونې د عمومي آمریت له خوا جوړ شوی چې موخه یې د ښوونکو ظرفیت لوړول او هم دوی ته د تدریس عصري لارې چارې ښودل دي.
په نوموړي ورکشاپ کې د نجونو او هلکانو د ۲۲ بیلا بیلو ښوونځیو ۱۵ ښځینه ښوونکو او ۳۸ نارینه ښوونکو، چې ټول ۵۳ ښوونکي کېږي برخه اخیستې ده.
د لوګر د پوهنې رئیس سید عزیز احمد هاشمي د ښوونکو د ظرفیتونو په لوړولو کې یاده روزنه مهمه وبلله او زیاته یې کړه، چې په راتلونکو ورځو کې به د مرکز پل علم په ګډون د پاتې نورو ولسوالیو ښوونکو ته هم ورته روزنیز پروګرامونه پیل شي.
