خوست کې د ښوونځیو آمرینو ته د وړتیا لوړونې ورکشاپ جوړ شو
د پوهنې وزارت، خوست: د خوست ولایت د پوهنې ریاست اړوند د ښوونځیو آمرینو، سر ښوونکو او د نظارت غړو ته د وړتیا لوړونې اوه ورځنی روزنیز ورکشاپ جوړ شو.
یاد ورکشاپ د خوست ولایت د پوهنې ریاست د نظارت آمریت له خوا جوړ شوی، چې د مرکزي ښوونځیو آمرینو، سر ښوونکو او د نظارت غړو پکې برخه لري.
د پوهنې ریاست د انسجام او هماهنکۍ آمر قدیرالله ساحل د یاد ورکشاپ د پرانیستې په مراسمو کې وویل، له ژمنیو رخصتیو په استفادې به د خوست په مرکز او ټولو ولسوالیو کې د یادو کسانو د ظرفیت لوړونې ورکشاپونه جوړ شي، چې په دې سره د دوی په کړنو کې مثبت بدلون رامنځته شي.
د ورکشاپ ګډونوالو ته به د ابتدایې ښوونځیو د لایحې، کاري او تدریسي پلان، د ښوونځیو په تحویلخانو کې د جنسونو قیدول اصول تدریس او مېتود په برخه کې روزنه ورکړل شي.
د یادونې وړ ده چې، ګډونوال به هغه موضوعات چې د ښوونکو او زده کوونکو اړوند وي، له ورکشاپ وروسته ښوونکو او زده کوونکو ته انتقال کړي.
