د کابل ښار او ولایت د ښوونکو د پنځم ا وشپږم بستونو لپاره ډلییزه ازموینه واخیستل شوه
پوهنې وزارت، کابل: د ښوونکو د ۷۴۰ څخه زیاتو بستونو د ډله ییزې آزموینې پروسه د وږي په ۷ د اصلاحاتو خپلواک کمیسون له خوا د پوهنې وزارت سره په همغږۍ ترسره شوه.
د پوهنې وزارت سرپرستې آغلې رنګینې حمیدي د ښوونکو د بستونو لپاره د آزموینې پروسې له پیل څخه خوښي څرګنده کړه او زیاته یې کړه: "دا پروسه به د شفافیت او لیاقت له اصولو سره سم پرمخ ولاړه شي."
د اداري اصلاحاتو او ملکي خدمتونو خپلواک کمیسیون رییس احمد نادر نادري په دې پروسه کې د ښځو لوی شتون یوه امیدواری وگڼله او زیاته یې کړه "د ښوونکو د ډله ییزې آزموینې په پروسه کې د برخه اخیستونکو ۶۰ سلنه ښځې دي."
په دې وروستیو کې به په ولایتونو کې د ښوونکو او اداري کارمندانو له لسو زرو ډیر پوستونه اعلان شي چي له دې جملې څخه په ۱۳ ولایتونو (ارزګان، بادغیس، بامیان، پروان، پکتیا، پکتیکا، خوست، زابل، غور، فراه، کاپیسا، نیمروز او هلمند) کې د اداري اصلاحاتو او ملکي خدماتو خپلواک کمیسیون لخوا د پوهنې وزارت سره په همغږي اعلان شی.
