د افغانستان او اماراتو د پوهنې وزیرانو په هیواد کې د آنلاین زده کړو د بنسټیز جوړښت پر تقویت خبرې وکړې
پوهنې وزارت - کابل: د پوهنې وزیر ډاکټر محمد میرویس بلخي د عربي اماراتو له پوهنې وزیر ابراهیم الحمادي سره د ویډیو کنفرانس له لارې د دوه اړخیزو همکاریو په ځانګړی ډول په هیواد د آنلاین زده کړو د بنسټیز جوړښت پر تقویت خبرې اترې وکړې.
د پوهنې وزیر له خپل امارتي سیال څخه د مننې ترڅنګ د افغانستان او اماراتو د پوهنې وزارتونو ترمنځ د پوهنې او روزنې په برخه کې د مرستو د نوي پړاو له پیل هم خبر ورکړ.
ښاغلي بلخي یادونه وکړه چې د پوهنې وزارت رهبري د کرونا ویروس له خپریدو مخکې په دې هڅه کې وه چې په آنلاین ډول د زده کړو د زیربناوو پر جوړښت او له انترنیټ سره د ښوونځیو د نښلولو آسانتیاوې برابرې کړي خو دې کار نړیوالو مرستو ته اړتیا درلوده.
پوهنې وزیر د 9 میلیونو زده کوونکو له زده کړو چې 40 سلنه یې نجونې دي خبر ورکړ او ویې ویل: په نړیواله کچه د تعلیمي سیستم ډیجیټالی کیدل او د پراختیا په حال او وروسته له جګړې هیوادونو یو ځای کیدل له دې سیستم سره افغانستان هم په دې برخه کې د خپلو زیربناوو د تقویت په هڅه کې دی.
د متحده اماراتو د پوهنې وزیر ابراهیم الحمادي په خپلو خبرو کې د افغانستان د پوهنې په برخه کې د همکاریو ژمنه وکړه او ویې ویل: دغه هیواد به د زده کړو په ډیجیټال سازۍ کې خپلې تجربې له افغانستان سره شریکې کړي.
په پای کې پرېکړه وشوه چې د دواړو لوریو د استازو په ګډون به تخنیکي ټیم جوړیږي تر څو د دواړو هیوادونو ترمنځ د پوهنې په برخه کې د همکاریو زمینه برابره کړي.
