د افغانستان د پوهنې پخواني وزیر ډاکتر اسدالله حنیف بلخي د مړینې له امله د پوهنې وزارت مشرتابه د خواشینۍ پیغام
د پوهنې پخوانۍ وزیر ډاکتر اسدالله حنیف بلخي یو وتلۍ، علم پوه شخصیت وو چې د ورپیښې ناروغۍ له امله یې له دې فاني نړۍ څخه د تل لپاره سترګې پټې کړې.
انالله و انا الیه راجعون
د پوهنې وزارت مشرتابه د دوی مړینه د هغوی درنې او علم پروره کورنۍ، د ښوونې او روزنې کورنې او د افغانستان درنو خلکو ته تسلیت وړاندې کوي او د خدای ج له دربار څخه مرحوم ته د فردوس جنت غوښتنه کوي.
ډاکتر اسدالله حنیف بلخي د مولوی محمد حنیف بلخي ځوی په ۱۳۳۶ لمریز کال کې د بلخ ولایت په یوه کلتوری او علم پروره کورنۍ کې زیږیدلۍ دۍ.
ډاکتر بلخي د اسلامی علومو په عرصه کې تر دوکتورا لوړې زده کړې کړي او په امام ابوحنیفه مدرسه، دکابل پوهنتون شرعیات پوهنځۍ، د مکه مکرمه په ام القرا پوهنتون کې په مختلفو برخو کې لوړې زده کړې کړې دي.
مرحوم بلخي د مکه مکرمه په ښار کې د ابوبکر صدیق عالی لیسه کې د تدریس سابقه، د کویټ په هیواد کې د افغانستان اسلامي جمهوری دولت په سفارت کې د افغانستان دولت استازیتوب د مستشار په توګه، د بهرنیو چارو وزارت د تړونونو او حقوقو ریاست معاونیت، د افغانستان اسلامی جمهوری دولت د دفتر ریاست کې د سیاسی چارو کارپوه په توګه، پوهنې وزارت کې د ښوونیز نصاب په برخه کې د مشاور، په کویت کې د افغانستان اسلامی جمهوری دولت استازي او د پوهنې وزارت مشرتابه په توګه دندې ترسره کړي دي.
اسدالله حنیف بلخي په خپل ژوند کې، ۶ ټوکه درسي کتابونه لیکلي او همدارنګه ۱۶ ټوکه فرهنګي کتابونه له عربي ژبې څخه فارسي ژبې ته ژباړلي دي.
د اسدالله حنیف بلخي په دوران کې د افغانستان ښوونه او روزنه د پام وړ لاسته راوړنو شاهد وو او پوهنې وزارت د هیواد ښوونې او روزنې چارو ته د حل او رسیدو په موخه د ښاغلي بلخي د هڅو ستاینه کوي.
یو ځل بیا د افغانستان د پوهنې پخواني وزیر او د ښوونې او روزنې خادم ډاکتر اسدالله حنیف بلخي د مړینې له امله تسلیت وړاندې کوم او د افغانستان ښوونې او روزنې کورنۍ ته د جمیل صبر غوښتونکۍ یم.
ډاکتر محمد میرویس بلخی
د پوهنې سرپرست وزیر
