پوهنې وزیر ډاکتر بلخي د مرکز او ولایتونو د ښوونکو روزنې رئیسانو سره په لیدنه کې د ښوونکو روزنې ستونزې وڅیړلې.
پوهنې وزارت- کابل: پوهنې وزیر ډاکتر محمدمیرویس بلخي د پوهنې وزارت د نصاب پراختیا او ښوونکو روزنې له معینې مرجان متین او د هیواد ولایتونو او مرکز د ښوونکو روزنې یو شمیر رئیسانو سره لیدنه او خبرې اترې وکړې.
پوهنې وزیر په غونډه کې د ښوونکو روزنې رئیسانو له لوري د شته ستونزو او ننګونو له اوریدو وروسته، د ولایتونو پوهنې رئیسانو او د ښوونکو روزنې رئیسانو په دوه اړخیزې همکارۍ او همغږۍ ټینګار وکړ.
د پوهنې وزارت د نصاب پراختیا او ښوونکو روزنې معینې آغلې مرجان متین په دې غونډه کې د ښوونکو روزنې او دارالمعلمینو اوسنۍ حالت د پوهنې له وزیر ډاکتر بلخي سره شریک کړ.
د ښوونکو روزنې رئیسانو د ښوونکو روزنې ستونزو د حل په موخه د پوهنې وزارت مشرتابه له پاملرنې څخه خوښي وښوده، او په ولایت او ولسوالیو کې د خپلو تر سره شویو کړنو راپورونه د پوهنې وزیر ته وړاندې کړل.
