د ننګرهار په تودو سیمو کې د ښوونځیو پر زده کونکو د قرطاسیې د ویش لړۍ پېل شوه
پوهنې وزارت_ننګرهار: د ننګرهار په تودو سیمو کې د ښوونځیو پر زده کونکو د قرطاسیې د ویش لړۍ پېل شوه
په هغه غونډه کې چې له همدې امله د ننګرهار ولایت د هسکي مینې ولسوالۍ د شپولې د نجونو په لیسه کې جوړه شوي وه ، دپوهنې ریس حسیب الله شینواري د ملګروملتونو د ماشومانو دنړیوال صندوق یونیسف ادارې څخه مننه وکړه چې هر کال له زده کوونکو سره د وړیا قرطاسیې مرسته کوي.
د پوهنې رییس وویل: په هیواد کې روانو جګړو او ناخوالو د کورنیو اقتصادي وضیعت خراب کړی او ډیری کورنۍ د خپلو اولادونو لپاره د قرطاسیې او د ښوونځي د نورو اړتیاو د پوره کولو وړتیا نه لری نو له همدې امله ددې قرطاسیې ویش ددغه بې وزله کورنیو سره د پام وړ مرسته ده. او دزده کوونکو د هڅونې سبب هم کیږي .
د یادونې وړ ده : چې دیونسیف ادارې له لورې مرسته شوې قرطاسیه کې بکسې، کتابچې، تورې تختې، پنسلونه، قلمونه، رنګې، پرکار او نورو اړتیا وړ توکي شامل دي، چې دمهال ویش سره سم به د ننګرهار ولایت په اتلس ولسوالیو کې د لومړي، دویم او دریم ټولګیو پر یوسلو شلو زرو تنو زده کوونکو ته وویشل شي .
