فراه ولایت کې دوه ښوونکي وستایل شول
د پوهنې وزارت، فراه: د فراه ولایت دوه تنه ښوونکي د هغوی د نه ستړي کیدونکو هلو ځلو په پار د کب په ۱۷مه، په مډال او ستاینلیک وستایل شول.
د یادو ښوونکو د ستاینې په غونډه کې د پوهنې رئیس استاد وحيدالله شیراني، د پوهنې رياست مرستيالانو، د یاد ریاست کارکونکو او ستایل شویو ښوونکو برخه اخیستې وه.
په یاده ستاینغونډه کې د تیمورشاه لېسې ښوونکي عبدالوهاب ته د غازي میربچه خان عالي دولتي مډال او د ښوونکو د روزنې استاد، عبدالبصیر ته لومړی درجه ستاینلیک ورکړل شو.
د فراه د پوهنې رئیس استاد وحيدالله شيراني د نوموړو ښوونکو پر ستاینې خوښي څرګنده کړه او ویې ویل: یاد ښوونکي، ولسمشر د ښه خدمت په بدل کې ستایلي دي او زیاته یې کړه چې دغه ویاړ یوازې د یادو ښوونکو نه، بلکې د فراه ولایت د ټولو ښوونکو دی، چې په راتلونکي کې به ځینې نور ښوونکي هم په ورته ډول وستایل شي.
د یادونې وړده، چې په تېرو کلونو کې هم د فراه یو شمېر ښوونکي د ولسمشر او پوهنې وزارت له خوا په مډالونو او ستاینلیکونو ستایل شوي.
