ننګرهار پوهنې ریاست اړوند ښوونځیو کې د نیالګیو کینولو کمپاین پېل شو
د پوهنې وزارت، ننګرهار: د ننګرهارپوهنې ریاست او د کرنې او مالدارۍ او اوبو لګولو ریاستونو د ګډ هوکړه لیک له مخې د یاد ولایت په ښوونځیو کې د نیالګیو کینولو کمپاین پیل شو.
په هغه غونډه کې چې په همدې موخه د ننګرهار عالي لیسي په انګړ کې جوړه شوي د ننګرهار پوهنې رئیس حسیب الله شینواري وویل: پوهنې ریاست دیو نوښت له مخې هوډ کړی چې په نمونوي بڼه به پنځوس ښوونځیو چاپیریال سمسوروي او ښکلایز او نور بوټي به پکې کینوي.
پوهنې رئیس وویل د ننګرهار د والي په لارښوونه دکرنې، مالدارۍ او اوبو لګولو ریاست سره د ګډ هوکړه لیک له مخې به کرنې ریاست پوهنې ریاست ته پنځوس زره ښکلایزاو نور بوټي ورکوي او پوهنې ریاست به دا بوټي په پنځوس ښوونځیو کې د نمونې به توګه د هر زده کوونکي په نوم یو بوټی نوموي او پالنه به یې به هماغه زده کوونکی کوي.
دننګرهار د کرنې او مالدارۍ ریس انجنیر انعام الله ساپي وویل کرنې ریاست به د شوي هوکړه لیک له مخې پر پنځوس زره ښکلایزو او نورو بوټو سربیره زده کوونکو ته د ونو نیالګی دپالنې په اړه مسلکي روزنه او لارښوونه هم ورکوي.
په پای کې د ننګرهار والي دپوهنې ریاست دا نوښت وستایه او دننګرهار لېسې په انګړ کې یې په خپل نوم دیوبوټي په کینولو سره له زده کوونکو وغوښتل چې د خپلو ښوونځیو د چاپیریال په زرغونتیا او سمسورتیا کې فعاله ونډه واخلي.
ننګرهار والی همدارنګه د دې ولایت له اوسیدونکو هم هیله وکړه چې سږ کال دکورنۍ هر غړی یو بوټی کینوي او د چاپیریال د ککړتیا په مخنیوي کې خپله ونده ادا کړي.
