د کندهار ولایت له حکیمیه مدرسې څخه ۳۵۰ تنه زده کوونکي فارغ شول
په هغه غونډه کې چي د کندهار ولايت د حکيميه ديني مدرسې د ٣٥٠ تنو فاضلانو او د قرآنکریم د حافظانو د فراغت په مناسبت جوړه شوې وه، د پوهني وزرات سرپرست وزير الحاج مولوي حبيب الله آغا، د لوړو زده کړو وزیر شیخ مولوي ندا محمد ندیم، د جامعه عمر امام او خطیب شیخ مولوي حبیب الله حقاني، د ياد ولايت والي حاجي محمد یوسف وفا او د هېواد له نورو ولایتونو څخه ګڼ شمېر شیوخو، علماوو، استادانو، مېلمنو او د زده کوونکو والدینو برخه اخیستې وه.
غونډه د سپېڅلي کلام د مبارکو آیاتونو په تلاوت سره پیل شوه. ورپسې د ا.ا.ا د پوهنې وزارت سرپرست وزیر الحاج مولوي حبیب الله آغا میلمنو ته د ښه راغلاست او فارغانو ته د مبارکۍ ویلو په ترڅ کې د ټولنې په پرمختګ کې د علومو او په ځانګړې توګه د دیني علومو پر اهمیت او ارزښت خبرې وکړې او فاضلان یې له خپلو مسئولیتونو څخه خبر کړل.
ورپسې والي او يو شمېر مېلمنو هم فاضلانو ته د فراغت مبارکي وويله او له هغوی څخه يې وغوښتل چې د اسلام د سپېڅلي دين د ارزښتونو په خپرولو کې خپله ونډه واخلي، د خپل وس او توان په اندازه د خلکو په خدمت کې واوسي او خپل هېواد او ملت جوړ کړي.
