د لوګر ولایت د هلکانو په یوه ښوونځي کې نیالګي ولګول شول
د پوهنې وزارت، لوګر: د لوګر ولایت د برکي برک ولسوالۍ د څلوزیو کلي، د څلوزیو د هلکانو ښوونځي په انګړ کې یو شمېر نیالګي ولګول شول.
دا نیالګي د څلوزیو سیمې ځینو دیني عالمانو، قومي مشرانو، د زده کوونکو د کورنیو غړو او د ښوونځي ادارې په ګډه لګولي دي.
یاد نیالګي د ښوونځي په انګړ کې، شاوخوا یوه جریب ځمکه کې لګول شوي دي چې په لګول شویو نیالګيو کې ځینې يې میوه لروونکي دي او ځینې نور یې بیا ښکلایيز دي.
د لوګر ولایت د پوهنې رئیس سید عزیز احمد هاشمي د څلوزیو کلي د اوسېدونکو یاد کار ستایي او د نورو سیمو له اوسېدونکو غواړي چې د خپلو سیمو په ښوونځیو کې نیالګي ولګوي.
د یادونې وړده، چې د لوګر اوسېدونکو په تېرو کلونو کې هم د خپلو سیمو په ښوونځیو کې میوه لرونکي او ښکلاییز نیالګي لګولي دي.
