په خوست کې د لکڼو سرکیو بوړیو ښوونځي ودانۍ ګټې اخیستنې ته وسپارل شوه.
د پوهنې وزارت، خوست :د خوست ولایت مرکز پورې اړوند د لکڼو سرکیو بوړیو ښوونځي ودانۍ د یو لړ مراسمو په ترڅ کې د مرستیال والي ښاغلي عبدالواحد پټان، د ولایتي شورا استازي قمرعلي لکڼوال، د پوهنې رئیس نصیر احمد روښان، د بېلابېلو ادارو چارواکو، دیني عالمانو، قومي مشرانو، ځوانانو او زده کوونکو له لوري پرانیستل شوه.
د خوست مرستیال والي وویل: د خوښۍ ځای دی، چې د سرکیو بوړیو ښوونځي ودانۍ نن ګټې اخیستنې ته وسپارل شوه، دا ودانۍ په دریو پوړونو کې د ۲۱ نیم میلیونه افغانیو په لګښت د هندوستان هیواد په مالي ملاتړ جوړه شوې.
ښاغلي پټان زیاته کړه ، ولایتي ادارې ته د پوهنې بهیر لومړیتوب لري او په نوي کال کې به هغو ښوونځیو ته هم ودانۍ جوړې شي، چې دا مهال یې زده کوونکي سرپناه نه لري.
همدارنګه د پوهنې رئیس نصیر احمد روښان په خپلو خبرو کې وویل: یاده ودانۍ ۱۷ ټولګي، ۶۸۸ متره د احاطې دیوال، ۵ غرفې تشنابونه، د اوبو ژوره څاه، ۲۲۰ جوړې میزونه او چوکۍ او نورې اړوندې ښونیزې آسانتیاوې لري، چې د یادې ودانۍ په جوړیدو سره زده کوونکو ته د زده کړو خوندي چاپېریال برابر شو.
همدا شان په یاده غونډه کې یو شمېر قومي مشرانو ویناوې وکړې او د یاد ښوونځي په پرانیستو یې خوښي څرګنده کړه او دا یې د خوست او په ځانګړي ډول د لکڼو لپاره لویه پروژه وګڼله.
