د لغمان ولایت د تعلیمي بنسټونو ښوونکو او مدرسینو لپاره مسلکي سیمینار جوړ شو
د لغمان ولایت مرکز مهترلام ښار او شپږو ولسوالیو کې په مدارسو سربېره د رسمي او خصوصي ښوونځیو ښوونکو لپاره درې ورځنی علمي سیمینار پیل شو.
د یاد سیمینار بنسټیزه موخه د تدریسي کیفیت لوړول، درسي ټولګیو کې د زدهکوونکو د فزیکي حضور پیاوړتیا، د تعلیمي نصاب تطبیق او د ښوونکو مسلکي وړتیاوو لوړول دي.
د لغمان ولایت پوهنې رئیس محترم مولوي شاه جهان ساجد، د سیمینارونو د جوړېدو ځایونو ته ولاړ او له ګډونوالو سره یې له نږدې خبرې وکړې.
نوموړي د داسې سیمینارونو جوړول د یاد ولایت د ښوونکو کاري وړتیاوو لوړولو لپاره اغېزمن وبلل او له هغوی یې وغوښتل چې د دغې علمي غونډې موضوعات په دقت واوري او په خپلو تعلیمي بنسټونو کې یې عملي کړي.
