پکتیکا په ښوونځیو کې ۶۰ قراردادي ښوونکي ګومارل کېږي
د پوهنې وزارت_پکتیکا: د پکتیکا د پوهنې ریاست په خپلو ښوونځیو کې د ۶۰ تنو قراردادي ښوونکو د ګومارنې لپاره ازموینه واخېسته.
د یادې ازموینې د پیل په مراسمو کې د پوهنې ریاست مسوولینو او یو شمېر نورو چارواکو برخه لرله.
په دغه آزموینه کې ۶۰ تنو د نیمه لوړو زده کړو او لوړو زده کړو فارغانو ګډون کړی وو، چې د یوې رڼې پروسې په پایله کې به په ښوونځیو کې د ښوونکو په توګه د یاد ولایت په مرکز او ولسوالیو کې پر دندو وګمارل شي.
د پوهنې رییس د آزموینې ګډونوالو ته د بشپړ شفافیت ډاډ ورکړ او ژمنه یې وکړه، چې د یو تن حق به هم نه تلف کېږي.
