افغان ستور پوهنې بنسټ د پکتيا پوهنې ریاست ته (۳۰) تليسکوپونه ډالۍ کړل
د پوهنې وزارت_پکتیا: د "افغان ستورپوهنې علمي ټولنې" په تېرو پنځلس ورځو کې د پکتیا په مختلفو ښوونځیو کې د زده کوونکو تر منځ د ستورپوهنې په برخه کې د مقالو لیکلو سیالۍ ترسره کړې چې د دغه سیالیو په نتیجه کې بریالیو لېسو ته انعکاسي تلسکوپونه او د ستورپوهنې سل جلده کتابونه ورکړل شول.
په همدې موخه جوړه شوي غونډه کې چې د ګردیز ښار د ښاروالۍ په تالار کې جوړ شوي وه د پکتیا والي محمدحلیم فدایی، پوهنې رئیس استاد کوچي ځاځي، قومي مشرانو، د لېسو امرینو، ښوونکو او زده کوونکو ګډون کړی ؤ.
پکتيا والي محمد حليم فدایي په پيل کې د سپين غر بنسټ له نيک احساس څخه مننه وکړه او د دوی کړنې یې وستایلې، ښاغلي فدایي د زده کوونکو د عصري او ديني زده کړو تر څنګ د دوی په فکر جوړونې، د وخت په ارزښت او په ځينو نورو مسايلو خبرې وکړې او زده کوونکي یې د عصري زده کړو او ښوونکي یې معياري تدریس ته وهڅول، ښاغلي فدایي زياته کړه، چې ټول ښځينه او نارينه زده کوونکي بايد د علم او پوهې تر څنګ لوړ او د هيواد جوړونې فکر هم زده کړي.
پوهنې رئیس، له افغان ستورپېژندنې علمي ټولنې مننه وکړه چې د پکتیا زده کوونکو لپاره یې دا ډول ګټور پروګرام برابر کړی ؤ او د دغه پروګرام د دوام غوښتنه یې وکړه.
پوهنې رییس کوچي ځاځي په خبرو کې وویل دا ډول پروګرام د زده کوونکو د هڅونې ترڅنګ د دوی استعدادونه هم پیاوړي کوي. ښاغلي ځاځي له زده کوونکو وغوښتل چې له دې موادو ښه استفاده وکړي او د خپل ژوند د بدلون پیلامه یې وګرځوي.
همدارنګه د افغان ستورپېژندنې علمي ټولنې مشر فهیم سپین غر د مراسمو ګډون والو ته د یادو سیالیو په هکله معلومات ورکړل او زیاته یې کړه چې، د پکتیا په مرکز او د ولسوالیو په ۴۰ ښوونځیو کې مونږ دغه سیالۍ ترسره کړې چې له جملې ۳۰ ښوونځي د سیالیو ګټونکي شول، ده وویل دغه ښوونځیو ته موږ یوه پایه انعکاسي تلسکوپ او سل جلده د ستورپېژندنې کتابونه د جایزې په توګه ورکوو. ښاغلي سپین غر وویل، له دې سیالیو یې هدف د زده کوونکو ترمنځ د ساینسي مناظرو، علمي تجربو ته هڅول او په ټولنه کې د ساینس فرهنګ ته کار کول دي. بریالیو زده کوونکو په خپلو مقالو کې خوښي ښوده او دا یې د مهارتونو د زیاتولو لپاره غوره ګام یاد کړ.
